Eftir miklar deilur í kanadíska þinginu um hvort lögleiða eigi líknardráp í landinu var það samþykkt síðastliðinn laugardag. Kanada er með löggjöfinni eitt af fáum ríkjum heims sem hefur lögleitt líknardráp.
Frumvarpið var kynnt í apríl af ríkisstjórn Justin Trudeau, forsætisráðherra og hefur vakið mikla athygli víða um heim. Samþykkið gerir fólki með ólæknanlega sjúkdóma eða varanlega fötlun heimilt að binda enda á líf sitt með aðstoð lækna.
Einstaklingur sem kýs að fara þessa leið þarf þó að uppfylla ýmis skilyrði er varðar andlega hæfni og vera orðinn 18 ára. Að auki þurfa tvö vitni að vera viðstödd þegar sjúklingur skrifar undir beiðni um aðstoð læknis við að binda enda á líf sitt.
