Réttarhöld standa nú yfir í Sviss vegna morðs sem framið var í febrúar árið 2024. Fegurðardrottning að nafni Kristina Joksimovic, 38 ára gömul, fannst þá látin í þvottahúsinu á heimili sínu í Binningen, sem er um 3 km suðvestan við Basel. Krufning leiddi í ljós að hún hafði verið kyrkt og síðan hafði lík hennar verið sundurhlutað með sög, hníf og garðklippum í þvottahúsinu. Nokkrir líkamshlutar voru settir í blandara og leystir upp í efnablöndu.

Hún lét eftir sig tvö börn. Eiginmaður Kristinu, Marc Rieben, 43 ára gamall, játaði fyrir lögreglu á sínum tíma að hafa valdið dauða eiginkonu sinnar, en sagðist hafa drepið hana í sjálfsvörn, en hún hafi ráðist á hann með hnífi. Sá framburður var ekki álitinn trúverðugur.

Í dag, mánudag, bar Rieben vitni í málinu og var tárvotur í dómsal. Hann sagðist hafa elskað Kristinu af öllu hjarta. Hann viðurkenndi að hún hefði dáið af hans hendi en sagði að það hefði verið slys. Rieben sagði:

„Ég hef valdið fjölskyldu minni ómælanlegum þjáningum. Hvers vegna? Hvers vegna brást ég? Hvers vegna gat ég ekki komið í veg fyrir það? Hvers vegna kom ég ekki í veg fyrir að hún dæi af minni hendi?“

Rieben sagðist taka fulla ábyrgð á dauða Kristinu. „Það sem ég gerði var algjörlega ófyrirgefanlegt og ég tek fulla ábyrgð á því. Ég iðrast þess einlæglega og ég biðst afsökunar.“

Nánar má lesa um málið hér.