Fjölskyldusöngleikurinn Þegar Trölli stal jólunum verður frumsýndur í nóvember næstkomandi á Stóra sviði Borgarleikhússins. Leikstjóri sýningarinnar er Valur Freyr Einarsson og ásamt glæsilegum hópi leikara mun stór barnahópur fara með hlutverk í sýningunni. 

Borgarleikhúsið auglýsir eftir kraftmiklum og skapandi krökkum fæddum á árunum 2012-2017 til að taka þátt í þessu töfrandi jólaævintýri.

Þau sem þekkja söguna um Trölla vita að börnin gegna lykilhlutverki í ævintýrinu sígilda. „Við upplifum söguna í gegnum þau. Ævintýrið um Trölla sem stelur jólunum lifnar ekki við án barna sem elska jólin” segir Valur Freyr leikstjóri söngleiksins. „Við leitum að kraftmiklum og fjölbreyttum hópi barna sem geta sungið og leikið og hafa ríkt ímyndunarafl. Við hvetjum börn af öllum kynjum og ólíkum uppruna til að sækja um í prufunum“.

Skráning í prufur fer fram á borgarleikhus.is. Opið er fyrir skráningar til og með 20. apríl og prufurnar fara fram í Borgarleikhúsinu á bilinu 1.- 21. maí. Æfingar hefjast 26. maí og frumsýning er í nóvember 2026.

Söngleikurinn Þegar Trölli stal jólunum er byggður er á hinu sívinsæla ævintýri Dr. Seuss frá árinu 1957. Sagan hefur verið útfærð á ótal vegu en þekktasta útfærslan er líklega kvikmyndin How the Grinch stole Christmas sem kom út árið 2000 og skartaði gamanleikaranum og stjórstjörnunni Jim Carrey í hlutverki Trölla (Grinch). Flestir Íslendingar þekkja söguna og er kvikmyndin orðin rótgróin jólahefð á mörgum heimilum.

Þegar Trölli stal jólunum verður frumsýndur í nóvember 2026 og verður það Evrópufrumsýning á söngleiknum.