Breska dagblaðið The Telegraph greindi frá málinu í vikunni. Geymsluhólfið var eitt af að minnsta kosti sex slíkum víðs vegar um Bandaríkin sem Epstein leigði á árunum 2003 til 2019.
Samkvæmt umfjöllun bandaríska blaðsins New York Post sýna kreditkortayfirlit að hann hóf að leigja slík rými árið 2003. Sum þeirra voru leigð allt til ársins 2019, sama ár og hann lést af völdum sjálfsvígs í fangaklefa í Manhattan.
Telegraph komst yfir birgðalista yfir innihald geymslunnar í Palm Beach. Samkvæmt honum fannst meðal annars þriggja blaðsíðna listi með nöfnum nuddara, ýmis konar bréf og rannsóknarniðurstöður sem ekki eru tilgreindar nánar.
Þá fundust VHS-spólur og DVD-diskar með efni sem sýndi unglinga í kynferðislegu samhengi, nektarmyndir af einstaklingum sem taldir eru hafa verið fórnarlömb Epsteins og kassar fullir af kynlífstækjum.
Samkvæmt umfjöllun Telegraph og New York Post greiddi hann starfsmönnum sínum fyrir að flytja gögn og muni frá heimili sínu í Palm Beach í geymsluna áður en yfirvöld gerðu húsleit þar árið 2005. Þetta var á sama tíma og foreldrar 14 ára stúlku leituðu til lögreglu eftir að dóttir þeirra var fengin til að fara heim til Epsteins gegn greiðslu.
Ekki liggur fyrir hvort bandaríska alríkislögreglan, FBI, hafi nokkru sinni fundið muni í geymslunum þegar hún byggði upp mál sitt gegn honum vegna mansals og kynferðisbrota.
