Félag líffræðinga á Kanaríeyjum hefur varað við vaxandi vandamáli sem snýr að fjölgun kakkalakka af tegundinni Periplaneta africana, eða svonefndir afrískir kakkalakkar, á eyjunni sólríku sem nýtur mikilla vinsælda meðal Íslendinga. Skordýrin hafa fundið sér kjörlendi í suðurhluta Gran Canaria þar sem hlýindi og raki styðja við útbreiðsluna.
Tegundin, sem er upprunnin í hitabelti Afríku, nær allt að 5 sentímetrum að lengd og er ein stærsta kakkalakkategund heims. Hún er rauðbrún að lit með gulbrúnum lit á brúsköldum og vængjum. Kakkalakkinn er félagslyndur, heldur sig í stórum hópum og er næturvirkur. Hann getur flogið langar vegalengdir og dreifist því hratt um ný búsetusvæði
Afríska kakkalakkan lifir að jafnaði í allt að 2,5 ár og fjölgar sér hratt. Kvendýrin geta framleitt allt að tvö eggjahylki á viku á frjósömustu stigum æviskeiðsins og verpa þeim nálægt fæðulindum.
Hlýindi og rakastig í suðurhluta Gran Canaria skapa kjöraðstæður til fjölgunar. Kakkalakkinn heldur sig gjarnan í holræsum, kjöllurum og öðrum dimmum og erfiðum rýmum þar sem hann nærist helst á lífrænum úrgangi.
Vísindamenn hafa bent á að kakkalakkarnir geti borið með sér að minnsta kosti 22 tegundir af bakteríum, veirum, sveppum og frumdýrum geti valdið sjúkdómum. Þar að auki hafa fundist fimm tegundir sníkjudýra á þessum tegundum kakkalakka.
Vandamálið snertir ekki aðeins heilsu fólks heldur einnig ímynd svæðisins sem ferðamannastaðar. Ferðalangar eru ekkert æstir í að deila fríinu með kakkalökkum. Hótel og veitingastaðir og heimili hafa því gripið til aðgerða til þess að halda þessum skordýrum í skefjum, en hefðbundnar aðferðir reynast oft ekki nægar.
Forvarnir séu nauðsynlegar sem og regluleg þrif auk þess sem mikilvægt sé að vera á varðbergi gagnvart mögulegum fæðuuppsprettum skordýranna. Þá sé mikilvægt að íbúar sem og ferðamenn taki þátt í að viðhalda hreinlæti og skipulagi á nærumhverfi sínu.
