Þorvaldur Þórðarson, prófessor í eldfjallafræði, útilokar ekki að gosið gæti aftur á Sundhnúkagígaröðinni fyrir árslok. Þetta segir Þorvaldur í samtali við Morgunblaðið í dag.

Veðurstofa Íslands lýsti í gær yfir goslokum vegna eldgossins sem hófst þann 16. júlí síðastliðinn, en um var að ræða níunda eldgosið á Sundhnúkagígaröðinni. Gosórói og strókavirkni féllu niður um helgina og er engin virkni lengur í gígunum.

Þorvaldur segir við Morgunblaðið að land sé tekið að rísa aftur við Svartsengi. Þó hafi dregið úr landrisinu sem bendir til þess að innflæði frá dýpri kvikugeymslunni í þá grynnri hafi minnkað. Vegna þess gæti lengri tími liðið þar til grynnri kvikugeymslan fyllist.

„Það væri þá í kring­um jól­in eða eitt­hvað svo­leiðis, ein­hvern tím­ann í des­em­ber,“ seg­ir hann við Morgunblaðið. Önnur hugsanleg sviðsmynd er á þá leið að kerfið nái ekki að viðhalda flæðinu úr dýpra kvikuhólfinu og þá stoppi þessi goshrina. Erfitt sé að segja til um framhaldið.

„Ef landrisið helst stöðugt eins og það er núna er langlík­leg­ast að það endi með eld­gosi,“ seg­ir Þor­vald­ur við Morgunblaðið í dag.