Strandveiðisjómaður lést í morgun eftir að bátur hans sökk skammt vestur af Blakki, suðvestur af Patreksfirði.

Í tilkynningu frá Lögreglunni á Vestfjörðum segir að henni hafi borist tilkynning rétt fyrir kl. 11 í morgun um atvikið. Kom fram að einn maður væri um borð.

Björgunarskipið Vörður II frá Patreksfirði fór rakleitt á vettvang ásamt nærstöddum bátum auk þess sem þyrla Landhelgisgæslunnar var kölluð út.

Maðurinn sem á bátnum var, fannst við þann stað sem báturinn sökk. Hann var í framhaldi fluttur til Patreksfjarðar en var við komuna þangað úrskurðaður látinn.          

Ekki er unnt að birta nafn hins látna að svo stöddu en samband hefur verið haft við nánustu aðstandendur vegna málsins.

Sjá einnig: Strandveiðibátur sökk úti fyrir Patreksfirði og maður lenti í sjónum

Rauði krossinn var einnig virkjaður í því skyni að veita þeim sem að málinu komu viðeigandi aðstoð.

Lögreglan á Vestfjörðum fer með rannsókn málsins og er Rannsóknarnefnd samgönguslysa kunnugt um það. Segir í tilkynningu lögreglunnar að ekki verða gefnar frekari upplýsingar um málið að svo stöddu.