Rasmus Højlund hefur kvatt Manchester United eftir að ljóst varð að hann gengur endanlega til liðs við Napoli.

Kaupskylda í lánssamningi hans var virkjuð þegar Napoli tryggði sér sæti í Meistaradeild Evrópu. Félagið greiðir um 38 milljónir punda fyrir framherjann þegar félagaskiptaglugginn opnar í sumar.

Højlund skoraði mark í 3-0 sigri Napoli á Pisa, leik sem staðfesti Meistaradeildarsætið og þar með félagaskiptin.

„Þetta mark var táknrænt,“ skrifaði hann á samfélagsmiðlum.

„Það þýðir að við erum komnir í Meistaradeildina og að ég er nú opinberlega orðinn leikmaður Napoli.“

Hann viðurkenndi að kveðjan við Manchester United væri tilfinningaþrungin. „Það var æskudraumur minn að spila á Old Trafford í rauðu treyjunni,“ sagði hann og þakkaði stuðningsmönnum, leikmönnum og starfsfólki félagsins fyrir tímann.

Højlund sagðist nú horfa fram á nýtt upphaf á Ítalíu og stefna að því að ná enn frekari árangri með Napoli.