Ruben Amorim gæti verið á leið aftur í þjálfun aðeins nokkrum mánuðum eftir að hafa verið rekinn frá Manchester United samkvæmt enskum miðlum.

Portúgalski stjórinn, sem var látinn fara frá Old Trafford í janúar eftir erfitt tímabil, er nú sagður líklegur til að taka við Benfica í heimalandinu. Amorim á að koma í stað José Mourinho sem er sterklega orðaður við endurkomu til Real Madrid.

Mourinho lauk nýverið tímabilinu með Benfica án taps í deildinni en liðið endaði þó aðeins í þriðja sæti og missti af sæti í Meistaradeild Evrópu. Florentino Pérez forseti Real Madrid er sagður vilja fá Mourinho aftur til að laga vandamál innan leikmannahóps spænska stórliðsins.

Rui Costa forseti Benfica hefur því beint sjónum sínum að Amorim sem hann þekkir vel frá fyrri tíð. Amorim lék sjálfur með Benfica áður en hann hóf þjálfaraferil sinn og vann síðar tvo portúgalska meistaratitla með erkifjendum félagsins í Sporting.

Hinn 41 árs gamli Amorim var áður talinn einn efnilegasti þjálfari Evrópu áður en illa gekk hjá honum hjá Manchester United.