Mikel Arteta er á leiðinni að verða einn launahæsti knattspyrnustjóri heims eftir að Arsenal tryggði sér enska meistaratitilinn í fyrsta sinn í 22 ár.

Samkvæmt enskum miðlum eru viðræður Arsenal og Arteta um nýjan samning langt komnar og búist er við að Spánverjinn fái gríðarlega launahækkun. Núverandi samningur hans átti að renna út næsta sumar.

Arteta hefur umbreytt Arsenal undanfarin ár og leiddi félagið loksins til Englandsmeistaratitilsins þegar Manchester City missti stig gegn Bournemouth á þriðjudagskvöld.

Talið er að nýr samningur muni færa Arteta nær toppnum yfir launahæstu þjálfara heims. Diego Simeone hjá Atlético Madrid er sagður tekjuhæstur með um 26 milljónir punda á ári en Arteta gæti nálgast þá upphæð.

Hann er nú talinn vera með um 10 milljónir punda í árslaun auk bónusa fyrir árangur í Meistaradeildinni.

Arteta mun einnig taka við sem sá þjálfari sem hefur starfað lengst samfleytt í ensku úrvalsdeildinni þegar Pep Guardiola yfirgefur Manchester City í sumar.

Arsenal hyggst ekki slaka á eftir meistaratitilinn og Arteta er þegar byrjaður að skipuleggja sumargluggann. Félagið hefur meðal annars verið orðað við unga sóknarmanninn Eli Junior Kroupi frá Bournemouth.