Max Dowman skrifaði sig í sögubækur ensku úrvalsdeildarinnar þegar Arsenal tryggði sér Englandsmeistaratitilinn á þriðjudagskvöld.’

Hinn aðeins 16 ára gamli sóknarmaður varð yngsti leikmaður sögunnar til að vinna úrvalsdeildina eftir að Manchester City missteig sig gegn Bournemouth og Arsenal tryggði sér titilinn í fyrsta sinn í 22 ár.

Dowman, sem fæddur er árið 2009, hefur átt ótrúlegt tímabil með Arsenal og slegið hvert metið á fætur öðru. Guinness World Records staðfesti metið á samfélagsmiðlum sínum og óskaði unga leikmanninum til hamingju.

Þetta er ekki í fyrsta skipti sem Dowman vekur heimsathygli. Hann varð yngsti leikmaður sögunnar til að spila í ensku úrvalsdeildinni þegar hann lék sinn fyrsta leik aðeins 15 ára og 235 daga gamall.

Síðar á tímabilinu varð hann einnig yngsti leikmaðurinn í sögu Meistaradeildarinnar.

Dowman skoraði svo sitt fyrsta úrvalsdeildarmark í mars þegar hann innsiglaði 2-0 sigur Arsenal gegn Everton með glæsilegu marki í uppbótartíma.

Ungstirnið hefur leikið fimm leiki í úrvalsdeildinni á tímabilinu og tryggt sér þar með verðlaunapening fyrir Englandsmeistaratitilinn. Alls hefur hann spilað tíu leiki fyrir aðallið Arsenal í öllum keppnum og er talinn eitt allra stærsta efni ensks fótbolta.