Knattspyrnufélag ÍA hefur náð samkomulagi við Breiðablik um varanleg félagaskipti Jóns Sölva Símonarsonar til félagsins. Jón Sölvi, sem er fæddur árið 2007, hefur skrifað undir þriggja ára samning við ÍA.
Jón Sölva ættu Skagamenn að þekkja vel en Jón Sölvi var á mála hjá liðinu á síðasta tímabili, þá á láni frá Breiðablik. Jón Sölvi á að baki 12 landsleiki fyrir U19 ára landslið Íslands og 7 landsleiki fyrir U17 ára landslið Íslands. Koma hans styrkir leikmannahóp ÍA fyrir verkefnin framundan, auk þess sem félagið sér mikil tækifæri í áframhaldandi þróun hans á komandi árum.
ÍA hefur fengið samþykkta undanþágu frá KSÍ vegna félagaskipta utan félagaskiptaglugga og hefur Jón Sölvi þegar fengið leikheimild með liðinu. Hann verður því löglegur með ÍA í leiknum gegn ÍBV í kvöld.
Árni Marinó Einarsson markvörður liðsins meiddist gegn Þór á dögunum og verður frá næstu vikurnar.
