Rio Ferdinand telur að Harry Kane ætti að fá að spila fyrri hálfleikinn gegn Tékkum til að sanna sig og ef hann gerir það ekki þá ætti að skipta honum út af.

Kane hefur ekki gert góða hluti á Evrópumótinu í knattspyrnu hingað til og hefur aðeins átt þrjú skot á EM til þessa og þar af ekkert sem hefur hitt á rammann. Kane var tekinn af velli á 74. mínútu fyrir Marcus Rashford í leiknum gegn Skotum á föstudag.

„Ég myndi láta hann spila. En ég vil fá meira frá honum. Hann er topp leikmaður,“ sagði Ferdinand á BBC.

„Hann var markahæstur og stoðsendingahæstur á síðustu leiktíð í ensku úrvalsdeildinni. Þú verður ekki lélegur yfir nóttu en ég vil fá að sjá þann Harry Kane sem ég sá í vetur.“

„Ef að hann gerir ekki vel í fyrri hálfleik gegn Tékkum þá þarf að skipta honum út og fá annan inn. Ekki bíða þar til þrettán mínútur eru eftir af leiknum, það er ekki nægur tími fyrir aðra leikmenn að hafa áhrif.“

Englendingar áttu aðeins eitt skot á markið gegn Skotum. Lokaleikur Englendinga í riðlinum er gegn Tékkum en bæði lið eru með 4 stig.