Lucy Bronze stefnir hátt með landsliði Breta á Ólympíuleikunum í Tókýó í sumar. Fyrsti leikur Breta er gegn Chile þann 21. júlí næstkomandi.

Bronze, sem var valin besta fótboltakona í heimi í desember í fyrra hefur unnið fjölmarga titla með félagsliðum sínum á ferlinum, þar á meðal þrjá Meistaradeildartitla með Lyon og þrjá Englandsmeistaratitla með Liverpool og Manchester City.

„Ég hef alltaf sagt að mig langar að vinna titil, gullmedalíu eða fyrsta sæti með landsliðinu, og Bretlands liðið okkar er fullkomið tækifæri til þess. Fólk spyr mig oft hvaðan hvatningin kemur nú þegar ég hef unnið allt, en ég hef ekki unnið allt vegna þess að ég hef ekki unnið neitt með landsliðinu. Mig klæjar í lófana að vinna eitthvað á alþjóðlegum vettvangi, til dæmis gullmedalíuna á Ólympíuleikunum, EM eða HM, og mun ekki leggja skóna á hilluna fyrr en það tekst. Nema að líkaminn gefur sig, annars þarf einhver að draga mig af vellinum. Ég held að velgengni drífi flesta leikmenn áfram og fyrir mér felst sú velgengni í titli með landsliðinu,“ sagði Lucy Bronze í samtali við BBC.