Wayne Rooney telur að Southgate ætti að láta Jack Grealish og Jadon Sancho byrja í stað Phil Foden hjá enska landsliðinu.
Englendingar spiluðu síðast á föstudagskvöld á Evrópumótinu í knattspyrnu gegn Skotum og spilaði liðið lélegan leik. Enska liðið ógnaði lítið fram á við og lauk leiknum með 0-0 jafntefli.
Phil Foden hefur byrjað báða leiki Englendinga á Evrópumótinu. Hann hefur ekki sýnt þá frábæru spilamennsku í þeim leikjum og hann sýndi hjá Manhcester City á tímabilinu og telur Rooney að það sé vegna þess að enska landsliðið spili allt öðruvísi fótbolta.
„City spilar á síðasta þriðjungnum. Þeir halda boltanum þar. Foden er mest í því að koma sér í góðar stöðu og gefa stuttar sendingar. Hjá City þá virkar þetta þar sem það er mikil hreyfing á liðinu,“ sagði Rooney í grein fyrir The Times.
„Hjá Englandi er hann oft einn úti á kanti og þegar hann fær boltann gerist allt hægt og lítil hreyfing í kringum hann. Þá þarf hann að fara sjálfur. Þegar það er staðan afhverju ekki að spila Grealish og Jadon Sancho, sem eru tveir af þeim bestu í heimi í þeirri stöðu.“
„Ég elska Foden en hann er bara orðinn City leikmaður. Pep leyfði honum ekki að fara á lán og prófa aðra gerð af fótbolta.“
Foden skoraði 16 mörk og gaf 10 stoðsendingar á síðasta tímabili og var valinn besti ungi leikmaður deildarinnar. Hann var einnig tilnefndur sem besti leikmaður tímabilsins.