Atli Jóhannsson, fyrrum leikmaður Stjörnunnar, ÍBV og KR, var gestur í hlaðvarpsþættinum skemmtilega Draumaliðið í vikunni en þátturinn er í umsjón Jóa Skúla.

Í Draumaliðinu fá leikmenn það verkefni að nefna sitt 11 manna draumalið skipað leikmönnum sem þeir léku með á ferlinum.

Hér og þar poppa þó upp skemmtilegar sögur af ferlinum og var þátturinn á miðvikudaginn engin undantekning.

Atli rifjaði upp mjög skemmtilega sögu frá árinu 2001 þegar leikmaður að nafni Alexander Ilic lék með honum í Vestmannaeyjum.

,,Það var einn áhugaverður þarna sem heitir Alexander Ilic, hann var hörku fótboltamaður en var ekki í góðu standi og var ekkert að vinna í því heldur,“ sagði Atli.

,,Það var frægt atriði þarna, Njáll Eiðsson var með okkur þá árið 2001 og við spilum við Fylki í Árbænum og Alexander er í liðinu. Þeir flengja okkur og það er 3-0 eða 4-0 í hálfleik.“

,,Tómas Ingi fær á sig klaufalegt víti, það var ekki oft sem hann komst í boxið! Í hálfleik voru allir niðurlútir og hugsuðu hvað væri í gangi.“

,,Njáll Eiðsson er að fara að hlaða í eina þrumuræðu eins og honum var lagið. Þá ákveður Alexander Ilic að taka upp Appelsín. Andlitið datt af öllum. Hann var alveg spes gæi!“

,,Njáll tók hann útaf, það var bara þannig. Alexander Ilic reddaði okkur þarna því við vorum að fara fá að heyra það en svo fékk hann einræðu.“