Vandamál vegna myglu í grunnskólum á höfuðborgarsvæðinu hefur orðið til þess að höfuðstöðvum KSÍ hefur nú verið breytt í skólastofur.

,,Það verður aldeilis líf í höfuðstöðvum KSÍ næstu vikur og mánuði. Það er búið að breyta 3. hæðinni hjá okkur í grunnskóla. Um 200 krakkar úr Fossvogsskóla eru mættir til leiks og ætla að stunda sitt nám með útsýni yfir Laugardalsvöll,“ skrifar KSÍ á Facebook síðu sinni.

Fyrst átti að færa börnin í húsnæði í Kópavogi en grunur um að mygla væri einnig þar, varð til þess að börnin fara nú í höfuðstöðvar KSÍ.

Nokkur spölur er frá Fossvogsskóla og niður í Laugardal en ætla má að sætaferðir verði fyrir börnin í og úr skóla.

Þriðja hæð KSÍ hefur að geyma fjölda rýma sem ættu að nýtast vel og gefa sambandinu einhverjar tekjur fram að sumri.

Fossvogsskóla var lokað á dögunum vegna myglu en verið er að vinna að úrbótum svo hægt sé að hefja starf þar aftur, næsta haust.