Líðan Sir Alex Ferguson er góð samkvæmt því sem kemur fram í breskum miðlum.

Ferguson var mættur á leik Manchester United og Liverpool í ensku úrvalsdeildinni í gær en leið ekki vel og var fluttur á sjúkrahús. Talið er að það hafi verið í varúðarskyni.

Þar var Skotinn skoðaður, eins og hafði reyndar líka verið gert á Old Trafford, og er hann á batavegi og við fína heilsu ef marka má fréttir að utan.

Ferguson veiktist og gekkst undir aðgerð vegna heilablæðingar árið 2018, en tekið er fram að veikindin í gær tengist þeim veikindum ekki á nokkurn hátt.

Michael Carrick, stjóri United, tjáði sig um fréttirnar af Ferguson eftir leikinn gegn Liverpool, sem vannst 3-2.

„Við vonum bara að hann sé í lagi. Við erum öll að hugsa til hans og vonandi líður honum betur eftir úrslitin,“ sagði Carrick, sem lék auðvitað undir stjórn Ferguson í mörg ár, eftir leik.

Ferguson stýrði United í 26 ár og vann meðal annars 13 Englandsmeistaratitla og Meistaradeildina tvisvar.