Cesc Fàbregas segist vonast til þess að þjálfa í ensku úrvalsdeildinni einn daginn, en tekur fram að hann sé ekkert að flýta sér að taka það skref.

Fyrrum miðjumaður Arsenal og Chelsea hefur vakið mikla athygli sem knattspyrnustjóri hjá ítalska félaginu Como, þar sem hann hefur leitt liðið úr Serie B og í baráttu um Evrópusæti. Góðgengi hans hefur þegar vakið áhuga stærri félaga víðs vegar um Evrópu.

Fàbregas segir þó að hann gæti vel hugsað sér að vera áfram hjá Como til lengri tíma.

„Enska úrvalsdeildin er besta deild í heimi. Ég hef alltaf verið mjög skýr með það. Ég fann það sem leikmaður og finn það líka sem þjálfari og stuðningsmaður,“ sagði Fàbregas í viðtali við Daily Telegraph.

Hann rifjaði einnig upp ráð sem hann fékk frá José Mourinho þegar þeir störfuðu saman hjá Chelsea.

„Mourinho sagði eitt sinn við mig: ‘Ég á enn 30 ár eftir á þjálfaraferlinum.’ Þannig að ég gæti verið hér í tíu ár og samt farið til ensku úrvalsdeildarinnar eftir 12 eða 15 ár.“

Fàbregas segir framtíðina óútreiknanlega og vill njóta augnabliksins þar sem hann sé afar ánægður með verkefnið hjá Como.