Það er útlit fyrir að Eddie Howe stýri Newcastle áfram á næstu leiktíð eftir fund með eigendum félagsins á dögunum.

Stjórnendur og Howe eru sammála um næstu skref eftir erfiða leiktíð, þar sem liðið hefur tapað 16 leikjum í ensku úrvalsdeildinni. Ítarleg greining verður gerð á stöðu liðsins í sumar og verður lögð áhersla á betri ákvarðanatökur á leikmannamarkaðnum, í von um að næsta tímabil verði betra.

Howe viðurkennir að hafa fengið erfiðar spurningar á fundinum, en nýtur áfram trausts. Hann hefur undanfarin ár skilað frábærum árangri, til að mynda með því að vinna deildabikarinn og tryggja sæti í Meistaradeildinni í tvígang.

Á fundinum voru til að mynda rædd áhrif þess að selja stjörnuleikmanninn Alexander Isak til Liverpool á síðustu leiktíð. Þá missti félagið af öðrum skotmörkum á sama tíma.

„Þegar þú vinnur ekki leiki byggist upp pressa. Ég vil ekki valda neinum vonbrigðum, hvorki stuðningsmönnum, leikmönnum né eigendum,“ sagði Howe til að mynda um málið.