Mikið hefur verið fjallað um hita og átök sem brutust út eftir leik Vals og KR í Bestu deild karla í gærkvöldi.

Fótbolti.net fjallaði um það laust fyrir hádegi í dag að átök hafi brotist út í leikmannagöngunum eftir 1-4 sigur KR og að Hermann Hreiðarsson, þjálfara Vals, sé gefið að sök að hafa kýlt í þindina á Ástbirni Þórðarsyni, leikmanni KR-inga.

Hermann hafði kvartað undan Ástbirni í viðtölum eftir leik og sagt að hann hafi komist upp með of mikið.

Í viðtali í Innkastinu á Fótbolta.net, sem nú er í loftinu á X-inu, er hins vegar rætt við Hemma og þar segir hann að búið sé að blása atburðarásina hressilega upp í fjölmiðlum.

Enn fremur segir hann að hann hafi rætt við Ástbjörn og málinu sé nú lokið af hálfu hans og KR-inga. Hermann segir leiðinlegt að athyglin beinist að þessum hlutum eftir frábæran fótboltaleik.

Eftir að viðtalið var spilað tók Elvar Geir Magnússon, ritstjóri Fótbolta.net, þó fram að hann stæði við innihald fréttarinnar sem birtist í dag.