Í því sem átti að vera hugguleg gönguferð úti í náttúrunni, hafa margar konur verið skildar eftir af kærastanum. CNN skýrir frá þessu og segir að þetta fyrirbæri megi rekja til austurrísks máls.
Undir myllumerkinu #alpinedivorce (alpaskilnaður) hafa margir deilt því sem þær lentu í í göngu- eða skíðaferðum. Segja þær frá því að kærastar þeirra hafi skilið þær eftir.
Alpaskilnaður er orð sem nær yfir stöður sem ná allt frá pirringi vegna gönguhraða eða ósamkomulags á leiðinni, til tilfella þar sem makinn er skilinn eftir af ásettu ráði.
Í myndbandi, sem hefur fengið einna mest áhorf á TikTok, segir grátandi kona frá því að hún hafi verið skilin eftir þegar hún var á göngu á afskekktu fjallasvæði. Það er notandinn Everafteriya sem birti það og skrifaði með því: „Sönnun þess að þú ferð í gönguferð með honum í fjalllendi en hann skilur þig eina eftir og þú fattar síðan að honum líkaði aldrei við þig.“
Þrátt fyrir að ekki hafi verið staðfest að konan sé að segja satt, þá hefur sagan snert við mörgum og um leið vakið undrun margra fyrir hvaða stöðu hún var í og almennt á því fyrirbæri sem Alpaskilnaður er.
Alpaskilnaður
Nafnið er dregið af skáldsögunni „An Alpine Divorce“ eftir Robert Barr en hún var gefin úr 1890.
Karlkyns söguhetjan í bókinni undirbýr sig undir að myrða eiginkonu sína með því að ýta henni fram af fjallsbrún. Þetta ætlar hann að gera til að losna úr óhamingjusömu hjónabandi.
Þessi bók var dregin fram í kastljósið í tengslum við mál hins austurríska Thomas Plamberger sem skildi kærustuna sína eftir uppi á ísköldu fjalli. Hann var ákærður fyrir manndráp af gáleysi því hún lést uppi á fjallinu. Hann var dæmdur í fimm mánaða skilorðsbundið fangelsi og til að greiða 9.400 evrur í sekt.
