Málið vakti mikinn óhug í samfélaginu, ekki síst vegna skelfilegra upplýsinga sem komu fram við rannsókn þess.
Hinn 26 ára Eric Leif Jordahl var í síðustu viku fundinn sekur um morð af yfirlögðu ráði á móður sinni, Rosalie „Rose“ Johnson, sem gegndi trúnaðarstörfum fyrir sveitarfélagið Big Lake. Slík sakfelling felur sjálfkrafa í sér lífstíðarfangelsi, samkvæmt lögum í Minnesota.
Samkvæmt gögnum málsins hófst árásin seint að kvöldi 23. júlí 2020 á heimili fjölskyldunnar. Talið er að ágreiningur hafi blossað upp eftir að Johnson sagði syni sínum að fara að sofa. Í kjölfarið réðst hann á hana með ofsafengnum hætti, þar sem hann kýldi hana, stakk og beit.
Faðir hans, Andrew Jordahl, kom heim úr vinnu morguninn eftir og fann son sinn í bílskúrnum alblóðugan. Í sakargögnum kemur fram að sonurinn hafi þá játað verknaðinn með skýrum hætti.
„Djöfullinn er til, hann er innra með mér, og ég át mömmu,“ sagði hann við föður sinn samkvæmt gögnum málsins.
Við komu á vettvang fann lögregla lík konunnar og kjöthníf á eldhúsborði. Þá fundust ummerki um árásina víða um húsið, meðal annars líkamshlutar, hár og blóð. Lík Johnson fannst í svefnherbergi hennar, þar sem hún var einnig með alvarlega áverka á höfði og andliti.
Þrátt fyrir sakfellinguna var búist við því að verjendur Jordahls myndu halda því fram fyrir dómi að hann bæri ekki refsiábyrgð vegna alvarlegra geðrænna veikinda.
Johnson var vel þekkt í nærumhverfi sínu. Hún var skipuð í borgarstjórn Big Lake árið 2019 og sat jafnframt í fleiri nefndum og félagasamtökum tengdum samfélagsmálum og menntun.
Morðið hafði djúp áhrif á samfélagið í Big Lake. Þremur mánuðum eftir andlát hennar vígðu fjölskylda og vinir minningarbekk í Lakeside Park henni til heiðurs.
