Kona, sem stundaði kynlíf með eineggja tvíburum með fjögurra daga millibili, varð barnshafandi eftir annan hvorn þeirra. Nú hefur breskur dómstóll komist að þeirri niðurstöðu að ekki sé hægt að skera úr um hvor maðurinn sé faðir barnsins.

Sky News skýrir frá þessu og segir að annar mannanna hafi farið með málið fyrir dóm í kjölfar þess að bróðir hans var skráður faðir barnsins á fæðingarvottorði þess.

Fjölskylduréttur neitaði að fjarlægja nafn hins meinta „föður“ af fæðingarvottorðinu og því fóru konan og hinn tvíburinn með málið fyrir áfrýjunardómstól í Lundúnum. Niðurstaða hans var að það „sé ekki hægt“ að vita með vissu hvor maðurinn sé faðir barnsins.

Fyrir dómi kom fram að DNA-rannsókn myndi ekki geta greint á milli mannanna en ekki sé þó útilokað að vísindamenn geti skorið úr því í framtíðinni.