Bandaríska kennslukonan Christina Formella, sem er þrítug, á allt að 60 ára fangelsi yfir höfði sér fyrir að hafa beitt 14 ára nemanda sinn kynferðislegu ofbeldi rúmlega 50 sinnum.

Formella starfaði sem sérkennari í bandarískum skóla. Hún var handtekin í mars eftir að móðir 14 ára pilts sá sms-skilaboð, sem höfðu gengið á milli Formella og sonar konunnar. Skilaboðin vöktu miklar áhyggjur hjá móðurinni.

Í einum skilaboðunum skrifaði Formella: „Ég elska að stunda kynlíf með þér.“

Formella var upphaflega kærð fyrir að hafa misnotað piltinn þrisvar sinnum kynferðislega. En umfang málsins jókst og nú er búið að ákæra hana í 55 liðum fyrir brot gegn piltinum. ABC 7 skýrir frá þessu.

Saksóknari heldur því fram að Formella hafi misnotað piltinn frá því að hann var 14 ára og að hún hafi stundað kynlíf með honum 45 sinnum, bæði á skólatíma og heima hjá henni.

Saksóknarinn segir að lögreglan hafi fundið „hundruð ef ekki mörg þúsund textaskilaboð“ sem passi vel við lýsingar piltsins þegar hann var yfirheyrður af lögreglunni.

Þrátt fyrir öll skilaboðin sem gengu á milli Formella og piltsins, þá neitar hún sök.