Það að sofa of lítið veldur ekki aðeins þreytu heldur getur það einnig haft áhrif á fitubrennslu líkamans og löngun í mat á milli mála. Þannig getur of lítill svefn til lengdar valdið ofþyngd.

Flestir hafa eflaust lent í að eiga erfitt með svefn um hríð. Áhyggjur, börnin eiga erfitt með að sofa eða eitthvað allt annað heldur vöku fyrir fólki. En ef fólk sefur sífellt of lítið eða lætur svefninn víkja fyrir einhverju öðru getur það haft heilsufarslegar afleiðingar.

Langvarandi svefnskortur getur haft áhrif á líkamlegt og andlegt heilbrigði. Þeir sem sofa of lítið borða frekar feitan og saltan mat og sykur en þeir sem sofa vel og nægilega mikið. Ástæðan er að líkaminn kallar eftir orku á þennan hátt þegar fólk sefur illa. Rannsókn vísindamanna við Gautaborgarháskóla leiddi einnig í ljós að sykursýki og ofþyngd er algengari hjá körlum, sem sofa minna en fimm klukkustundir á hverri nóttu, en hjá þeim sem sofa í sjö til átta klukkustundir.

Önnur rannsókna frá Uppsala háskóla sýnir að hættan á að fólk sé í ofþyngd og með sykursýki 2 er meiri hjá þeim sem þjást af sífeldum svefnskorti því lítill svefn hefur áhrif á fitubrennsluna. Ef það vantar upp á svefninn langar fólk oftar í skjótfengna orku og sykur. Allt hefur þetta síðan áhrif á vigtina.