Eitt hrottalegasta morð síðustu ára í Hong Kong er klárlega mál áhrifavaldsins Abby Choi Tin-fung. Lögregla hennar tilkynnti um hvarf hennar í febrúar árið 2023 og örfáum dögum síðar kom lögregla að ólýsanlegum hryllingi í leiguhúsnæði á afskekktum stað í Tai Po.
Þar beið lögreglu mikill hryllingum en þar fundust verkfæri á borð við kjötkvörn, vélsög, síðir regnfrakkar, hanskar og grímur. Inni í ísskápnum mátti svo finna líkamshluta. Ljóst var að Choi hefði verið myrt og aflimuð í húsnæðinu. Höfuð hennar og nokkur rif fundust svo í súpupotti innan um gulrætur og annað grænmeti. Búkur hennar og hendur reyndust þó ekki vera í leiguíbúðinni.
Fljótlega var fyrrverandi eiginmaður áhrifavaldsins, Alex Kwong Kong-chi, handtekinn vegna morðsins, en ekki bara hann heldur líka bróðir hans, Anthony Kwong og faðir þeirra, Kwong Kau. Allir þrír voru ákærðir fyrir morð. Móðir Alex, Jenny Li Sui-heung, var svo ákærð fyrir að hindra framgang réttvísinnar fyrir að hafa villt um fyrir lögreglu.
En hvers vegna var áhrifavaldurinn myrt með jafn hrottalegum hætti? Saksóknarar töldu að ástæðan væri einföld – peningar. Choi var áhrifavaldur með marga fylgjendur og góðar tekjur. Hún hafði stutt fjölskyldu eiginmanns síns jafnvel eftir skilnaðinn. Það hefur þó ekki dugað fjölskyldunni og því fór sem fór. Lögregla segir að það hafi verið faðir Alex sem hafi átt hugmyndina að morðinu, en hann er fyrrverandi lögreglumaður. Choi hafði meðal annars keypt fasteign handa fyrrum tengdarföður sínum en ætlaði sér nú að selja hana. Því ákvað Kwong-fjölskyldan að plata Choi á afskekktan stað undir því yfirskyni að hún væri að fara að sækja börnin sem hún átti með fyrrverandi manni sínum. Þess í stað beið hennar dauðinn.
Fyrrum eiginmaðurinn ætlaði sér að komast upp með morðið og eftir að líkamsleifar Choi fundust reyndi hann að flýja Hong Kong með bát. Honum var þó ekki kápan úr því klæðinu og bíður nú Kwong-fjölskyldan eftir að aðalmeðferð fari fram í máli þeirra.
