Tólf ára gömul stúlka kallar eftir réttlæti í opnu bréfi sem hún skrifar tíu árum eftir að faðir hennar var myrtur á leið heim á feðradaginn.

Christian Bagley, 30 ára, var stunginn til bana með tveimur hnífsstungum 21. júní 2015 í Hereford á Englandi. Hann hafði verið í heimsókn hjá 19 mánaða gamalli dóttur sinni og var hann á heimleið.

Í handskrifuðu bréfi sem lögreglan í West Mercia birti í þessari viku skrifaði dóttirin, sem nú er 12 ára: 

„Að einhver taki pabba minn frá mér þegar ég var lítil er eitthvað sem aldrei er hægt að réttlæta. Ég fékk aldrei tækifæri til að kynnast honum. Það er tómleiki innra með mér, sem ætti ekki að vera, vegna þess að einhver myrti pabba minn. Þetta tómarúm innra með mér mun alltaf vera til staðar. Ég mun aldrei geta haldið upp á feðradag, jól eða afmæli með pabba mínum.“

„Þar sem tíu ár eru liðin frá morðinu á Bagley býður Crimestoppers upp á um 20 þúsund punda verðlaun fyrir upplýsingar sem leiða til handtöku og sakfellingar í málinu.

„Þó að við höfum haldið áfram að rannsaka þetta mál, þá virðist áratug síðar tímabærara en nokkru sinni fyrr að ákalla almenning aftur um að hjálpa okkur að ná réttlæti fyrir dóttur Christians, móður hans og alla fjölskyldu hans og vini,“ sagði Gareth Lougher, rannsóknarlögreglumaður hjá lögreglunni í West Mercia, í yfirlýsingu.

„Við vonum að þessi hjartnæmu skilaboð muni kalla á samvisku einhvers sem býr yfir upplýsingum,“ sagði Lougher.

„Eftir 10 ár kann hollusta og tryggð að hafa breyst,“ sagði hann. „Við vonum að hver sem er sem veit eitthvað muni gera það rétta og tala við okkur.“

Bagley var myrtur á göngustígnum Great Western Way, einnig þekktur sem The Lines. Hann hljóp að nálægri götu, Charles Witts Avenue, til að fá hjálp en lést síðar af sárum sínum.

Hnífurinn sem notaður var til að stinga hann var enn fastur í handlegg hans; lögreglan sagði að handfangið hefði brotnað af á vettvangi.

Þrátt fyrir margar handtökur í málinu á síðasta áratug, og þótt lögreglan hafi tekið þúsundir vitnaskýrslna, að því er BBC greinir frá, hefur enginn grunaður verið ákærður.

„Christian var góðhjartaðasta manneskjan sem þú myndir nokkurn tímann hitta,“ sagði móðir Bagley, Janette „Jan“ Bagley, í eigin yfirlýsingu. „Ef ég hefði verið hinum megin við vatnið, hefði hann gengið yfir það bara til að hjálpa okkur, hann elskaði dóttur sína, dóttir hans var líf hans.Vinsamlegast, einhver einhvers staðar veit eitthvað. Segðu mér af hverju þú gerðir þetta við drenginn minn.“ 

Lögreglan hvetur alla sem hafa upplýsingar til að gefa sig fram í gegnum opinbera vefsíðu þeirra eða nafnlaust í gegnum Crimestoppers.