Það var vinkona Kylee sem hafði samband við hana eftir að móðir hennar, 78 ára, tjáði henni að hún væri orðin yfir sig ástfangin af einstökum manni sem væri búsettur erlendis.
Vinkona Kylee taldi að maðkur væri í mysunni en sagði jafnframt að móðir hennar væri viss í sinni sök um að maðurinn væri til í raun og veru og ástin væri gagnkvæm.
„Ég hringdi í móður hennar og spurði hana út í þennan mann. Hún sagði mér að þetta væri viðskiptajöfur sem væri búsettur erlendis. Hún hefði að vísu bara séð myndir af honum en hún væri orðin yfir sig ástfangin.“
Kylee skoðaði myndir af manninum enda virtist málið vera grunsamlegt, ekki síst í ljósi fjölda fregna af óprúttnum svikahröppum sem hafa eldra fólk að féþúfu. „Hann virtist vera á sextugsaldri, var mjög myndarlegur og virkaði í flottu líkamlegu formi,“ segir Kylee við News.com.au.
Hún komst að því að myndin af „viðskiptajöfrinum“ var af allt öðrum manni sem er búsettur í Bandaríkjunum og setti Kylee sig í samband við hann. Sá kannaðist ekki við að eiga í ástarsambandi við 78 ára konu í Ástralíu. Kylee segir að samtalið við vinkonu móður sinnar hafi verið erfitt.
„Hún var eyðilögð og grét því hún hélt í raun og veru að þessi maður væri til,“ segir hún. Eftir að málið komst í hámæli fékk hún fleiri fregnir af sambærilegum málum og ákvað hún í kjölfarið að stofna eigin fyrirtæki til að koma fólki í sambærilegri stöðu til hjálpar.
Kylee telur sig þegar hafa komið í veg fyrir þó nokkurn fjölda svikamála og nefnir sem dæmi 80 ára karlmann sem sendi konu sem hann taldi sig eiga í ástarsambandi við þúsund dollara á mánuði. Í ljós kom að konan var ekki til. En hún hefur líka skoðað mál þar sem einstaklingurinn var í raun og veru til.
Svikamálum af þessu tagi hefur fjölgað hratt á undanförnum árum og eru til ófá dæmi um einstaklinga sem tapað hafa milljónum eftir að hafa komist í kynni við óprúttna aðila á neitnu. Hafa ber í hug að svikahrapparnir geta verið mjög sannfærandi og mikil vinna legið að baki þeim, enda ávinningurinn oftar en ekki mikill ef fólk bítur á agnið.
