Það er óhætt að segja að hjónabandssælan hafi ekki enst lengi hjá pari einu. Aðeins þremur mínútum eftir að þau voru gefin saman skildu þau. Ástæðan voru ummæli sem brúðguminn lét falla þegar hjónin voru á leið út úr dómsalnum þar sem þau voru gefin saman.

Þegar dómari hafði gefið þau saman gengu nýgiftu hjónin út úr dómhúsinu en á leiðinni út datt brúðurin. Brúðguminn sagði hana þá heimska af því að hún hafði dottið.

Q8 News segir að konan hafi reiðst mjög við þetta og lagt fram kröfu hjá dómara um að fá skilnað strax frá eiginmanninum. Dómarinn féllst á þessa kröfu hennar og ógilti hjónaband þeirra þremur mínútum eftir að hann gaf þau saman.

Fólkið, sem býr í Kúveit, komst aldrei út úr dómshúsinu sem hjón. Er þetta talið vera stysta hjónaband sögunnar í Kúveit.