Getur þú staðið á öðrum fæti í 10 sekúndur hið minnsta? Ef ekki þá er útlitið svart hjá þér ef miðað má við niðurstöður nýrrar rannsóknar. Samkvæmt þeim þá eru tvisvar sinnum meiri líkur á að fólk, sem getur þetta ekki, deyi innan 10 ára en þeir sem geta þetta.

Ef þú átt í erfiðleikum með að standa á öðrum fæti getur það verið merki um að eitthvað sé að. Miðaldra og eldra fólk sem getur ekki staðið á öðrum fæti í 10 sekúndur er tæplega tvisvar sinnum líklegra til að deyja innan 10 ára en þeir sem geta staðið á öðrum fæti í 10 sekúndur. The Guardian skýrir frá þessu.

Fram kemur að jafnvægisskyn fólks geti veitt innsýn í heilsufar þess. Niðurstöður fyrri rannsókna hafa bent til að það að eiga í erfiðleikum með að standa á öðrum fæti geti tengst auknum líkum á að fá heilablóðfall. Einnig hafa rannsóknir sýnt að fólk með lélegt jafnvægisskyn stendur sig verr á prófum er varða andlega hnignun og þykir það benda til tengsla við elliglöp.

Niðurstöður nýju rannsóknarinnar hafa verið birtar í the British Journal of Sports Medicine.

Vísindamennirnir segja að niðurstöðurnar séu þess eðlis að fella eigi jafnvægispróf inn í heilsufarsrannsóknir eldra fólks.