Í tíu daga voru morðinginn Casey White og fangavörðurinn Vicky White á flótta undan laganna vörðum. Í nótt, að íslenskum tíma, barst lögreglunni ábending um að þau væru í bíl á bílastæði í Evansville í Indiana. Eftir skamma eftirför endaði bíll þeirra ofan í skurði.

Þegar lögreglumenn komu að bílnum sat Vicky, 56 ára, undir stýri og var með skotsár á höfði. Casey, 38 ára, sat í farþegasætinu og var með minniháttar áverka eftir útafaksturinn.

CNN segir að Casey hafi sagt að Vicky hafi skotið sjálfa sig í höfuðið. Dave Wedding, lögreglustjóri, sagði að frásögn Casey „virðist vera rétt“ og að hún hafi líklega skotið sig þegar bíllinn var kominn ofan í skurðinn.

Vicky var strax flutt á sjúkrahús þar sem hún lést af völdum áverka sinna.

Vicky og Casey létu sig hverfa þegar verið var að flytja Casey fyrir dómara í Florence í Alabama. Vicky sagði samstarfsfólki sínu að Casey ætti að fara í geðrannsókn en það var ekki rétt og þau létu sig hverfa. Mikil leit hófst í kjölfarið og lauk henni í nótt.

Talið er að þau hafi átt í ástarsambandi.