Nýr sjúkdómur byrjaði að breiðast út í Kerala á Indlandi í maí og hefur nú náð til tveggja annarra ríkja. Þetta er svokölluð „tómatainflúensa“ og vara læknar nú við henni og útbreiðslu hennar.

„Tómatainflúensan“ veldur hita, höfuðverk, þreytu, uppköstum og niðurgangi. Að auki fylgja henni rauðar blöðrur sem valda töluverðum sársauka. Þær breiðast út um allan líkamann og geta í verstu tilfellum verið á stærð við tómata. Þannig er nafnið á sjúkdómnum tilkomið.

Samkvæmt því sem kemur fram í grein í Lancet Respiratory Medicine þá höfðu 82 börn, yngri en 5 ára, greinst með sjúkdóminn í Kerala þann 26. júlí.

Vísindamenn eru enn að afla sér meiri upplýsinga um veiruna. Börn eru sérstaklega viðkvæm fyrir henni því hún smitast við snertingu, til dæmis með bleium, við það að snerta óhreina fleti eða þegar einhverju er stungið í munninn.

Í greininni í Lancet kemur fram að þessi sjaldgæfa vírussýking hafi ekki borist út fyrir Indland og sé ekki talin lífshættuleg. En vegna reynslu heimsbyggðarinnar af COVID-19 sé nauðsynlegt að vera á varðbergi til að koma í veg fyrir að veiran breiðist frekar út.

Læknar segja að erfitt sé að greina „tómatainflúensuna“ því sjúkdómseinkennin minni mjög á COVID-19, beinbrunasótt og chikungunya veiruna. Tveir síðarnefndu sjúkdómarnir eru algengir á Indlandi á regntímanum en mýflugur bera þær veirur í fólk.

Læknar telja að „tómatainflúensan“ sé ekki lífshættuleg en vegna þess hversu smitandi hún er verða sýktir einstaklingar að vera í einangrun í um fimm daga.