Vísindamenn hafa þróað nýtt lyf sem vonast er til að geti gert út af við ónæmar bakteríur, ofurbakteríur. Lyfið heitir Fabimycin. Þetta nýja sýklalyf getur gert út af við 300 tegundir ónæmra baktería.

Talið er að ónæmar bakteríur valdi dauða um 7 milljóna manna á ári. Sumir sérfræðingar hafa varað við að vandinn af völdum þeirra geti aukist enn meira samhliða hnattrænni hlýnun. Þessar bakteríur hafa þróað með sér ónæmi gegn sýklalyfjum sem eru mörg hver ofnotuð eða notuð á rangan hátt.

Daily Mail segir að niðurstöður rannsóknar á músum hafi leitt í ljós að Fabimycin hafi gert út af við ónæmar lungnabólgu bakteríur og þvagfærasýkingu. Tilraunir á rannsóknarstofu leiddu einnig í ljós að lyfið virkaði gegn 300 öðrum tegundum ónæmra baktería.

Vísindamenn segja að þetta geti verið lykillinn að meðferð þrálátra sýkinga í fólki.

Rannsóknin hefur verið birt í ACS Central Science en það voru vísindamenn við University of Illinois sem stýrðu henni.