Mörgum Frökkum er brugðið og þeir hafa miklar áhyggjur. Ástæðan er að í gær skall fjórða hitabylgja sumarsins á landinu og fór hitinn upp í 37 gráður. Þessar hitabylgjur hafa að vonum haft slæm áhrif á vötn, ár og umhverfið í heild sinni og auðvitað á fólk.

B.T. segir að nú sé svo komið að drykkjarvatn sé á þrotum í mörgum bæjum og borgum og að franskir bændur vari landsmenn nú við yfirvofandi mjólkurskorti í vetur.

Meteo France, franska veðurstofan, segir að þurrkarnir í landinu séu þeir verstu síðan mælingar hófust 1958.

Reiknað er með að þeir muni enn versna fram í miðjan mánuðinn en nær engin úrkoma hefur verið í landinu að undanförnu eða aðeins tæpur einn cm.

Reuters segir að landbúnaðarráðherra landsins hafi sagt að þetta þýði að kornuppskeran verði 20% minni en á síðasta ári. Það er auðvitað ekki til að bæta ástandið á matvælamörkuðum þar sem verð hefur hækkað mikið vegna lítils útflutnings á korni frá Úkraínu og Rússlandi.

Skortur á korni þýðir fóðurskort fyrir kýr að sögn franskra bænda og því gæti dregið úr mjólkurframleiðslu.

Gripið hefur verið til takmarkana á vatnsnotkun um nær allt land og nú má ekki lengur vökva garða eða þvo bíla.