Breska lággjaldaflugfélagið EasyJet hefur ákveðið að fjarlægja eina sætaröð úr Airbus A319 flugvélum sínum. Það verður aftasta sætaröðin sem verður fjarlægð. Þetta er hluti af viðbrögðum félagsins við heimsfaraldri kórónuveirunnar og áhrifum hans en eins og mörg flugfélög hefur EasyJet átt í erfiðleikum frá því að faraldurinn braust út.

Það er þó bjartara yfir núna og fólk er farið að ferðast meira en síðustu misserin. Eins og mörg flugfélög neyddist EasyJet til að segja upp fólki á meðan heimsfaraldurinn var í hámarki. Það hefur gengið erfiðlega að fá fólk aftur til starfa og við því er EasyJet meðal annars að bregðast með því að fækka sætum í vélum sínum.

Með því að fækka um eina sætaröð er „aðeins“ pláss fyrir 150 farþega og það gerir að verkum að það nægir að vera með þrjá flugliða um borð í stað fjögurra eins og nú er.

Samkvæmt reglum flugmálayfirvalda er stjórnast fjöldi flugliða af fjölda sæta um borð í flugvélum en ekki fjölda farþega í hverju flugi.

BBC hefur eftir talsmanni EasyJet að félagið reikni með að komast nærri farþegafjöldanum sumarið 2019 í sumar. Fyrir heimsfaraldurinn flutti félagið tæplega 300.000 farþega á dag á háannatíma en það eru um 2.000 flugferðir.