Dýraverndunarsinnar í Indóensíu eru miður sín eftir að eins árs gamall fílskálfur drapst á dögunum eftir að hafa misst helminginn af rana sínum í gildru veiðiþjófa. BBC greinir frá.
Það voru þorpsbúar í indónesíska bænum Aceh Jaya sem fundu kálfinn stórslaðan í gildrunni. Hann var fluttur í dýraathvarf þar sem hann komst undir læknishendur. Til þess að bjarga lífi kálfsins neyddust dýralæknar til þess að skera helminginn af rana dýrsins unga. Kálfurinn ungi tórði síðan í tvo daga eftir aðgerðina en talið er að sýking hafi orðið honum að aldurtila.
„Við gátum ekki bjargað honum því meiðsli hans voru svo slæm og þegar komin sýking í þau,“ hefur BBC eftir Agus Arianto, yfirmanni dýraathvarfsins í Aceh Jaya.
Súmatrafílar eru í bráðri útrýmingarhættu vegna ágangs manna á náttúruleg heimkynni þeirra á indónesísku eyjunum Súmötru og Borneó. Karlkynsfílar eru í sérstaklega viðkvæmri stöðu því veiðiþjófar ásælast skögultennur þeirra sem eru seldar á svörtum markaði.
Dauði kálfsins er nýjasta dæmið um röð tilvika á svæðinu þar sem fílar drepast eftir árásir veiðiþjófa. Í júlí fannst afhöfðað hræ fullvaxins fíls og höfðu skögultennur hans verið fjarlægðar.