Leikarinn, hinn 22 ára Christopher Pogozelski, hafði tekið veiðihníf með sér að heiman í von um að geta lífgað enn frekar upp á upplifun gestanna.
„Hann gekk í átt að syni mínum með hníf í höndinni og ætlaði að hræða okkur,“ sagði Bednarski í samtali við News 5.
Frank hræðist ekki auðveldlega og fannst honum ekki mikið til um hnífinn og sagði við Pogozelski: „Hann er ekki einu sinni ekta, ég er ekki hræddur,“ sagði Bednarski.
Þá byrjaði Pogozelski að stinga hnífnum ítrekað ofan í grasið en var aðeins of ákafur í að reyna að hræða Frank og stakk hnífnum óvart í fót hans. Bednarski hafði strax samband við lögregluna.
Þegar lögreglan kom á vettvang „blæddi lítillega“ úr stórutá Frank. Fjölskyldan afþakkaði frekari aðstoð því Frank vildi halda áfram að skemmta sér í draugahúsinu segir í umfjöllun Charlotte Observer.
Eigandi draugahússins, Rodney Geffert, segir að um óhapp hafi verið að ræða. Pogozelski sé mjög vinsæll meðal gesta draugahússins. Bednarski er ekki sátt við hvernig starfsfólk draugahússins tók á málinu og sagði að það hafi bara sagt að óhöpp eigi sér stað. Hún sagði einnig að Frank hafi verið neitað um skyndihjálp því starfsfólkið hefði ekki hlotið þjálfun í að veita skyndihjálp.