Talið er að hákarl hafi orðið sundkonu að bana við strönd Maine í Nýja-Englandi í Bandaríkjunum í gær. Ef staðfest verður að hákarl hafi orðið konunni að bana er það aðeins í annað skipti sem staðfest er að hákarl hafi komið nálægt manneskju við strendur ríkisins.

Sky skýrir frá þessu. Fram kemur að samkvæmt upplýsingum frá Maine Marine Patrol hafi vitni séð konu á sundi við strönd Bailey Island. Konan virtist meiðast og komu tveir kajakræðarar henni til aðstoðar og komu henni í land.

Þegar í land var komið fékk konan aðhlynningu frá sjúkraflutningamönnum en allt kom fyrir ekki og hún lést. Ekki hefur verið skýrt frá nafni konunnar og yfirvöld hafa ekki staðfest opinberlega að hákarl hafi orðið henni að bana.

Það er mjög sjaldgæft að hákarlar komi nærri fólki við strendur Maine og Nýja-Englands í heild. Eina staðfesta tilfellið til þessa var 2010 þegar kafarinn Scott MacNichol náði að hrekja hákarl, sem hafði synt nærri honum og kom sífellt nær, á brott með neðansjávarmyndavél sinni.

Vitað er um 460 árásir hákarla á fólk við strendur Bandaríkjanna frá 2010 til 2019. Sex létust í þessum árásum að sögn International Shark Attack File.