Dick Advocaat er að öllum líkindum að taka aftur við landsliði Kúrasaó aðeins þremur mánuðum eftir að hann hætti með liðið.

Þessi 78 ára gamli Hollendingur sagði starfi sínu lausu í febrúar til að sinna veikri dóttur sinni, eftir að hafa tryggt Kúrasaó sæti á HM 2026. Hann mæltist þá til þess að landi hans Fred Rutten tæki við liðinu.

Rutten entist þó aðeins í 77 daga. Kúrasaó tapaði 2-0 fyrir Kína og síðan 5-1 gegn Ástralíu í vináttuleikjum í mars, en í kjölfarið fóru sögur af stað um ósætti innan hópsins og að menn vildu að Advocaat tæki við aftur.

Ráðning Advocaat verður væntanlega staðfest á næstu dögum. Ef hann stýrir liðinu á HM verður hann elsti landsliðsþjálfari í sögu heimsmeistaramótsins.