Vísindamenn við Oxfordháskólann í Bretlandi hefja á morgun tilraunir á fólki með bóluefni gegn COVID-19. Matt Hancock heilbrigðisráðherra segir að 500 sjálfboðaliðar muni taka þátt í prófununum. Vísindamennirnir, sem hafa þróað bóluefnið, telja 80 prósent líkur á að það virki.

Hancock segir að þróun bóluefnis séu „óörugg vísindi“ en nú séu tveir hópar vísindamanna í Bretlandi sem hafi náð góðum árangri í þróun bóluefnis gegn COVID-19. Auk hópsins í Oxford hafa vísindamenn við Imperial College London einnig unnið hörðum höndum að þróun bóluefnis en það er ekki enn tilbúið til prófana á fólki.

Sarah Gilbert, sem stýrir vinnu vísindamannanna í Oxford, á nú þegar í viðræðum við bresk stjórnvöld um að hefja framleiðslu bóluefnisins strax, þrátt fyrir að tilraunum með það sé ekki lokið. Það vill hún gera til að bóluefnið verði tilbúið áður en hugsanleg önnur smitbylgja COVID-19 skellur á í haust.

„Við viljum ekki vakna upp við það síðar á árinu að við séum með mjög virkt bóluefni sem við höfum ekki framleitt nóg af.“

Sagði Gilbert í samtali við The Times.

Hópur hennar vonast til að geta verið tilbúinn með eina milljón skammta af bóluefninu í september ef það reynist virka gegn veirunni.

Breska ríkisstjórnin styður fjárhagslega við vinnu beggja hópa en þeir hafa fengið 42 milljónir punda til verksins.