Hsiao segir að hún muni ekki láta Kínverja ógna sér.
Hún heimsótti Tékkland snemma á síðasta ári. Ríkin eru ekki með stjórnmálasamband sín á milli en Tékkar eigi í mjög góðum samskiptum við Taívana. Það eru Kínverjar ósáttir við því þeir líta á lýðræðisríkið sem órjúfanlegan hluta af Kína.
Tékkneskir fjölmiðlar skýrðu frá því á síðasta ári að kínverskur stjórnarerindreki hefði ekið gegn rauðu ljósi þegar hann elti bíl Hsiao. Miðillinn irozhlas.cz skýrði frá því í síðustu viku að kínverskir embættismenn hefðu haft í hyggju að valda bílslysi.
„Ég fór í frábæra heimsókn til Prag og þakka tékkneskum yfirvöldum fyrir gestrisnina og fyrir að tryggja öryggi mitt. Ólögmætar aðgerðir kínverska kommúnistaflokksins ógna mér ekki og koma ekki í veg fyrir að ég tali fyrir hagsmunum Taívan á alþjóðavettvangi,“ sagði Hsiao í færslu á samfélagsmiðlum á sunnudaginn.
„Taívan verður ekki einangrað með hótunum,“ sagði Hsiao.
Talsmaður tékkneska hersins sagði að kínverskir stjórnarerindrekar hefðu sýnt af sér hegðun sem brýtur reglur um starfsemi diplómata í landinu. Þeir hafi fylgt Hsiao eftir, aflað sér upplýsinga um dagskrá hennar og hafi reynt að njósna um fundi hennar við mikilvæga fulltrúa Tékklands úr röðum stjórnmálamanna og úr einkageiranum.
Talsmaðurinn sagði að leyniþjónusta hersins hefði séð kínversku leyniþjónustuna reyna að búa til aðstæður sem beindust gegn manneskju, sem naut verndar yfirvalda, en þetta hafi þó aldrei komist lengra en á undirbúningsstig.
Talsmaður kínverska utanríkisráðuneytisins þvertók fyrir að landar hans hefðu gert eitthvað rangt og sakaði Tékka um afskipti af kínverskum innanríkismálum með því að taka á móti Hsiao.
