Bráðabirgðalíkhús voru síðast notuð í kjölfar hryðjuverkaárásanna á Bandaríkin þann 11. september 2001 en þá létust tæplega 3.000 manns.
Sky-fréttastofan ræddi við starfsfólk á sjúkrahúsi í Queens í New York um hvernig staðan væri núna miðað við í kjölfar hryðjuverkaárásanna 2001. Steve Kassipis, læknir á gjörgæsludeild Mount Sinai sjúkrahússins, var ekkert að skafa utan af hlutunum:
„Það er komið með fólk. Það er barkaþrætt. Það deyr. Þessi hringur endurtekur sig.“
Hann var einnig á vakt þann 11. september 2001 og hefur því góðan samanburð:
„Það var ekkert miðað við þetta. Þá biðum við eftir að sjúklingarnir kæmu en þeir komu ekki. Nú koma þeir stanslaust.“