Rúmlega 7.000 heilbrigðisstarfsmenn um allan heim hafa látist af völdum kórónuveirunnar síðan heimsfaraldurinn braust út. Þetta kemur fram í nýrri skýrslu frá mannréttindasamtökunum Amnesty International. Á heimasíðu samtakanna kemur fram að þessi tala segi væntanlega ekki alla söguna, líklega hafi enn fleiri látist.

„Að rúmlega 7.000 manns hafi látist við að reyna að bjarga lífi annarra er mjög gagnrýnisvert. Heilbrigðisstarfsfólk um allan heim á rétt á öryggi við störf sín,“

segir Steve Cockburn, sem stýrir þeirri deild Amnesty International sem sér um efnahagslegt  og félagslegt jafnrétti.

Samtökin byggja niðurstöðu sína á greiningu á gögnum frá mörgum ríkjum. Í  Mexíkó hafa að minnsta kosti 1.320 heilbrigðisstarfsmenn látist og er það mesti fjöldinn í einu landi. Í Bandaríkjunum eru þeir 1.077 og í Brasilíu 634. Í þessum löndum hefur verið mikið um smit og andlát af völdum veirunnar. Í Suður-Afríku hafa 240 látist og 573 á Indlandi og vekja þær tölur miklar áhyggjur því í löndunum hefur smitum fjölgað hratt að undanförnu.

„Það er hneyksli að svo margir láti lífið,“

segir Cockburn.

Amnesty segir að þrátt fyrir að heimsfaraldurinn hafi nú staðið yfir mánuðum saman sé heilbrigðisstarfsfólk enn að látast af völdum veirunnar. Það sé nauðsynlegt að taka upp alþjóðlegt samstarf um að útvega nauðsynlegan hlífðarbúnað svo heilbrigðisstarfsfólk geti sinnt mikilvægu starfi sínu án þess að þurfa að stefna eigin lífi í hættu.