32 ára ítölsk kona var nýlega dæmd í sex og hálfs árs fangelsi af dómara í Prato. Ástæðan er að hún eignaðist barn með 13 ára pilti. Eiginmaður hennar var dæmdur í 18 mánaða fangelsi fyrir að segjast vera faðir barnsins.

Corriere della Sera skýrir frá þessu. Verjendur konunnar héldu því fram að hún hefði átt í sambandi við piltinn eftir að hann varð fjórtán ára en refsilaust er að stunda kynlíf með þeim sem hafa náð þeim aldri. Þeir héldu því einnig fram að pilturinn hefði ekki haft neitt á móti sambandi þeirra eða að stunda kynlíf með konunni.

Konan kenndi piltinum ensku í hjáverkum. Hún hélt því fram fyrir dómi að þau hefðu verið ástfangin. Fyrir dómi kom fram að hún hafði meðal annars hótað að fyrirfara sér ef pilturinn yfirgæfi hana.