Norska lögreglan segir að her landsins viti ekki hvar 1.600 Colt-skammbyssur eru. Vitað er að hluti þeirra er í höndum glæpamanna og safnara. Lögreglan hefur fundið 57 byssur og hluta úr 50. En ekki er vitað hvort og þá hvað margar af þeim tæplega 1.500 skammbyssum sem út af standa eru í höndum fólks.

VG skýrir frá þessu. Fram kemur að lögreglan hafi fundið hlaðna skammbyssu heima hjá 48 ára afbrotamanni í Skien. Í kjölfarið var farið að kanna vopnaskrá hersins. Í ljós kom að skammbyssan sem hann var með átti að hafa verið eyðilögð 2008 en það hafði greinilega ekki gengið eftir. Í samtali við VG sagðist hann hafa greitt 7.000 norskar krónur fyrir byssuna.

Lögreglan hóf að rannsaka mál tengd byssunum fyrir fjórum árum og varð fljótt ljóst að um umfangsmikið mál var að ræða. Í tengslum við rannsóknina hefur lögreglan komið upp um mörg ólögleg vopnaviðskipti og meðferð og vörslu ólöglegra vopna.

Talsmaður lögreglunnar segir að komið hafi í ljós að herinn hafi ekki verið með nægilega traustar reglur um meðferð vopna þegar á að eyðileggja þau. Safnarar og byssusalar hafi nýtt sér glufur og veikleika í meðferð slíkra mála hjá bæði hernum og lögreglunni.

Lögreglan telur að herinn hafi tekið vopnin og geymt í staðinn fyrir að eyðileggja þau en þau á að eyðileggja með því að rífa þau í tætlur.