Heit og æsandi nótt með eiginmanninum var nærri því búin að kosta 46 ára konu frá Baltimore í Maryland í Bandaríkjunum lífið. Þau stunduðu kynlíf en um þremur klukkustundum síðar fékk konan háan hita, bólgnaði og svimaði. Síðan bættist mikill kláði við, niðurgangur og lágur blóðþrýstingur. Hún var flutt á sjúkrahús í skyndi.

Þar var það mat lækna að hún hefði fengið sýkingu í æðar og fékk hún meðferð miðað við það segir í skýrslu um málið. Skýrslan er nefnd „Almost killed by love: A Cautionary Coital Tale“ sem í lauslegri þýðingu þýðir: „Næstum drepin af ást: Samfarasaga til aðvörunar.“ Sciencealert skýrir frá þessu.

Frekari rannsóknir á konunni leiddu í ljós að ekki var um sýkingu að ræða. Hún hafði fengið heiftarleg ofnæmisviðbrögð vegna ástarleiksins með eiginmanninum. Þau notuðu ekki smokk þegar þau höfðu samfarir og það skýrði málið því eiginmaðurinn var nýbúinn að vera á sýklalyfjakúr vegna hjartasjúkdóms. Það voru leifar af sýklalyfinu í sæði hans og þessar leifar orsökuðu ofnæmisviðbrögðin hjá konunni sem er einmitt með ofnæmi fyrir sýklalyfjum.

Læknismeðferðinni var því breytt í samræmi við þetta og var þá hægt að útskrifa konuna af sjúkrahúsi 24 klukkustundum síðar. Hjónunum var ráðlagt að halda sig frá kynlífi í eina viku á meðan sýklalyfið hreinsaðist úr líkama mannsins.