Nú fer jólaundirbúningurinn fyrst á fullt enda aðeins vika til jóla. Hér eru því fimm réttir fyrir vikuna sem tekur enga stund að matreiða, eða tuttugu mínútur eða minna.
Uppskrift af Eat Well 101
Hráefni:
450 g risarækjur, hreinsaðar
salt og pipar
vorlaukur, saxaður
safi úr einu súraldin
2 msk. hunang
2 msk. Sriracha sósa
1 tsk. hvítlaukur, smátt saxaður
2 msk. sojasósa
Aðferð:
Kryddið rækjurnar með salti og pipar, en gott er að þræða rækjur upp á grillpinna ti lað gera matreiðsluna enn þá einfaldari. Grillið eða steikið rækjurnar á meðalhita þar til þær eru eldaðar í gegn. Blandið súraldinsafa, hunangi, sojasósu, Sriracha sósu og hvítlauk vel saman og penslið rækjurnar með sósunni á meðan þær eldast. Hellið restinni af sósunni í pönnu og hitið yfir meðalhita þar til sósan þykknar. Hellið allri sósunni yfir rækjurnar og skreytið með vorlauk.
Uppskrift af Averie Cooks
Hráefni:
340 g spaghettí
salt
450 g nautahakk
700 g tilbúin pastasósa
fersk basil, saxað
rifinn parmesan ostur
Aðferð:
Sjóðið pasta samkvæmt leiðbeiningum á pakka. Hitið smá olíu yfir meðalhita á pönnu og steikið kjötið. Bætið sósunni út í þegar kjötið er eldað og hrærið vel saman. Leyfið þessu að hitna í gegn í 2 til 3 mínútur. Hellið vatninu af pastanu og blandið saman við kjötið og sósuna. Smakkið til og saltið eftir smekk. Skreytið með basil og parmesan og berið strax fram.
Uppskrift af Natasha‘s Kitchen
Hráefni:
8–10 sneiðar beikon, skornar í bita
1 mangó, skorið í teninga
4 bollar soðin hrísgrjón (mega vera dagsgömul)
graslaukur, smátt saxaður
Aðferð:
Takið til pönnu og hitið hana yfir meðalhita. Steikið beikonið þar til það er næstum því stökkt. Skiljið um það bil 2 matskeiðar af beikonfitu eftir í pönnunni. Bætið mangó út í og steikið í 2 til 3 mínútur með beikoninu. Bætið hrísgrjónum saman við og hitið í gegn. Berið fram með graslauk, en hér er tilvalið að prófa sig einnig áfram með einhvers konar sósu.
Uppskrift af BBC Good Food
Hráefni:
3 stórar gulrætur, grófsaxaðar
1 msk. engifer
1 tsk. túrmerik
smá cayenne pipar
20 g heilhveitibrauð
1 msk. sýrður rjómi
200 ml grænmetissoð
Aðferð:
Setjið öll hráefni í blandara eða matvinnsluvél og maukið. Hellið blöndunni í pott og hitið þar til súpan er sjóðandi heit. Skreytið með sýrðum rjóma og cayenne pipar og berið strax fram.
Uppskrift af Damn Delicious
Hráefni:
500 g kjúklingur, skorinn í bita
taco krydd
1 msk. ólífuolía
4 stórar tortilla kökur
2 lárperur, skornar í teninga
1 bolli rifinn ostur
¼ bolli sýrður rjómi
¼ bolli Ranch sósa
¼ bolli ferskt kóríander, saxað
Aðferð:
Hitið olíu í pönnu yfir meðalhita. Kryddið kjúklinginn með taco kryddi og bætið honum út í pönnuna. Steikið í nokkrar mínútur, eða þar til kjúklingurinn er eldaður. Setjið til hliðar. Hitið tortilla kökurnar lítið eitt. Setjið síðan kjúkling, lárperu, ost, sýrðan rjóma, Ranch sósu og kóríander í miðjuna á hverri tortilla köku. Lokið kökunum vel. Setjið burrito á pönnuna og eldið á meðalhita í um 3 til 4 mínútur á hvorri hlið, eða þar til osturinn hefur bráðnað. Berið strax fram.
