Héraðssaksóknari hefur ákært mann fyrir tvær líkamsárásir en sú fyrri átti sér stað fyrir utan Réttarholtsskóla, aðfaranótt þriðjudagsins 10. september árið 2024. Ákærði er sagður hafa veist að manni og stungið hann með hníf í vinstri síðu og mjöðm með þeim afleiðingum að brotaþoli hlaut 1 sm langan línulegan skurð á kviðvegg í vinstri síðu og 1 sm langan línulegan skurð yfir vinstri mjaðmakamb. Einnig hlaut hann yfirborðsáverka á úlnlið og hendi.

Maðurinn er einnig ákærður fyrir að hafa á sama tíma haft í fórum sínum 70 stykki af MDMA.

Maðurinn er ennfremur ákærður fyrir líkamsárás utandyra við Álfabakka miðvikudagskvöldið 6. ágúst árið 2025. Hann er sagður hafa veist að manni og slegið hann tvívegis í höfuðið með járnröri með þeim afleiðingum að brotaþoli hlaut tvo opna skurði framarlega á hársverði og hruflsár á vinstra hné.

Brotaþoli árásarinnar við Réttarholtsskóla krefst rétt tæplega 2,5 milljóna króna í bætur og brotaþoli árásarinnar við Álfabakka 3,75 milljóna króna, þar af eru 3 milljónir í miskabætur, 250 þúsund í skaðabætur og 500.000 í þjáningarbætur.

Fyrirtaka verður í málinu við Héraðsdóm Reykjavíkur 1. júní næstkomandi.