Guðmundur Árni Stefánsson, oddviti Samfylkingarinnar í Hafnarfirði og fyrrum bæjarstjóri, segist íhuga stöðu sína eftir að fyrstu tölur birtust en samkvæmt þeim tapar flokkur hans tveimur bæjarfulltrúum.

„Þetta eru mikil vonbrigði. Það er hægri sveifla í Hafnarfirði,“ sagði Guðmundur í samtali við RÚV. Hann segir þetta skell en að dómurinn sé fallinn. Hafnfirðingar hafi kosið þetta yfir sig og þó að hér sé aðeins um fyrstu tölur að ræða þá sé búið að leggja línurnar.

Það er ekki vanalegt í pólitík að bera ábyrgð en ég ætla að gera það hér. Ég segi að þetta er meira mín ábyrg en flokksins og ég held að þetta séu skilaboð til mín um það að ég eigi að hugsa minn gang og það ætla ég að gera. En jafnaðarmenn verða eftir sem áður ráðandi afl í Hafnarfirði, hvort sem það verður á næsta kjörtímabili eða því þarnæsta, þá verður Hafnarfjörður það kratabæli sem því ber og menn munu komast á raun um það.“

Að spurður sagði Guðmundur að það gæti vel farið svo að hann stígi til hliðar, en hann þurfi að ræða það við sitt fólk. Skilaboðin séu skýr. Samfylkingin hafi bætt við sig í síðustu kosningum en nú hafi það gengið til baka.

„Og ég hef allaf í pólitík axlað mína ábyrgð og ég skynja það að kannski er minn tími kominn. Það er bara svoleiðis. En kratar eiga eftir að láta til sín taka í Hafnarfirði þó síðar verði, það liggur ljóst fyrir.“